அமெரிக்க இராஜாங்க செயலாளர் ஜோன் கெரி எதிர்வரும் சனிக்கிழமை இலங்கைக்கு வருகிறார்
அமெரிக்க இராஜாங்க செயலாளர் ஜோன் கெரி எதிர்வரும் மே மாதம் இரண்டாம் திகதி சனிக்கிழமை இலங்கைக்கு உத்தியோகபூர்வ விஜயம் ஒன்றை மேற் கொள்ளவுள்ளார் என்று வெளிவிவகார அமைச்சின் தகவல்கள் தெரிவித்துள்ளன. மேலும் 24 மணித்தியால விஜயமாகவே ஜோன் கெரியின் இலங்கை விஜயம் அமையும் எனவும் தெரிவிக்கப்படுகிறது. இலங்கைக்கு விஜயம் செய்யவுள்ள அமெரிக்க இராஜாங்க செயலர் ஜோன் கெரி ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க, வெளிவிவகார அமைச்சர் மங்கள சமரவீர உள்ளிட்டோரை சந்தித்து பேச்சுவார்த்தை நடத்தவுள்ளார்.
அத்துடன் புதிய அமெரிக்க தூதரகத்திற்கான அடிக்கல் நாட்டு வைபவத்திலும் வெசாக் தோரணங்களை அங்குரார்ப்பணம் செய்து வைக்கும் நிகழ்விலும் ஜோன் கெரி பங்கேற்க உள்ளதாகத் தெரிவிக்கப்படுகிறது.
மேலும் தமிழ்த் தேசியக் கூட்டமைப்பின் பிரதிநிதிகளையும் சிவில் அமைப்புக்களின் பிரதிநிதிகளையும் சந்தித்து பேச்சுவார்த்தை நடத்தவுள்ளார். இதனபோது இலங்கைக்கும் அமெரிக்காவுக்கும் இடையிலான உறவை மேலும் வலுப்படுத்துவது குறித்தும் விரிவாக ஆராயப்படவுள்ளது.
1972ம் ஆண்டு ஜூலை மாதம் அமெரிக்க ராஜாங்கச் செயலாளராக கமையாற்றிய வில்லியம் பியர்ஸ் ரொஜர்ஸிற்கு அடுத்தபடியாக ஜோன் கெரியே இலங்கைக்கு விஜயம் செய்கின்றார் என்பது விசேட அம்சமாகும்.
இந்நிலையில் ஜோன் கெரியின் இலங்கை விஜயம் தொடர்பில் பிரதி வெளிவிவகார அமைச்சர் அஜித் பெரெரா தகவல் வெளியிடுகையில்,
அமெரிக்க இராஜாங்க செயலாளர் ஜோன் கெரி விரைவில் இலங்கைக்கு உத்தியோகபூர்வ விஜயத்தை மேற்கொள்ளவுள்ளார். இது முக்கியத்துவம் வாய்ந்த விடயமாகும். அவரின் இலங்கை விஜயத்துக்கான திகதிகளை விரைவில் ஊடகங்களுக்கு அறிவிப்போம் என்றார்.
இலங்கையில் ஜனாதிபதி மைத்திரிபால சிறிசேன தலைமையில் புதிய அரசாங்கம் அமைக்கப்பட்டதும் வெளிவிவகார அமைச்சர் மங்கள சமரவீர அமெரிக்காவுக்கு உத்தியோகபூர்வ விஜயம் மேற்கொண்டிருந்ததுடன் இராஜாங்க செயலர் ஜோன் கெரியை சந்தித்து பேச்சுவார்த்தை நடத்தியிருந்தார்.
அத்துடன் புதிய அரசாங்கம் பதவியேற்றதன் பின்னர் தெற்கு மற்றும் மத்திய ஆசிய விவகாரங்களுக்கான அமெரிக்காவின் உதவி இராஜாங்க செயலாளர் நிஷா பிஷ்வால் இலங்கைக்கு விஜயம் மேற்கொண்டதுடன் பல்வேறு தரப்புக்களையும் சந்தித்து பேச்சுவார்த்தை நடத்தியிருந்தார்.
மூலம்/ஆக்கம் : இணையத்தள செய்திYou can leave a response, or trackback from your own site.
Leave a Reply